Mixgħela tas-Siġra tal-Milied

Il-Ħadd, 8/12 fis-6.15pm, issir il-mixgħela tas-Siġra tal-Milied fil-pjazza.  Wara jkun hawn il-quddiesa tas-7.00pm li se tkun animata b’mod speċjali għaż-żgħażagħ f’dan iż-żmien li jippreparana għall-Milied.

Bejgħ ta’ ħlewwiet tal-Milied u punsjetti b’risq il-missjoni fil-Perù

F’dan it-tmiem il-ġimgħa, fuq iz-zuntier qed isir bejgħ ta’ ħlewwiet tal-Milied u punsjetti b’risq il-missjoni fil-Perù, minn grupp ta’ żgħażagħ mill-parroċċa tagħna. Ħaġa sabiħa li ngħinuhom f’din l-inizjattiva. 

Laqgħa Grupp Kelma tal-Ħajja

It-Tlieta, 10/12 fid-9.30am jiltaqa’ l-Grupp tal-Kelma tal-Ħajja. Il-laqgħa se ssir fil-kappella ta’ San Ġużepp għand is-sorijiet.

Laqgħa Grupp San Piju

L-Erbgħa. 11/12 jkun hawn il-laqgħa tal-Grupp ta’ San Piju li tibda fis-6.00pm bir-Rużarju fil-Knisja Arċipretali u tkompli bil-quddiesa tas-6.30pm.

Il-Kċina ta’ Marta

Matul dan iż-żmien tal-Avvent u l-Milied, il-parroċċa tagħna se tkun qed tgħin fl-inizjattiva tal-Kċina ta’ Marta li s-Segretarjat tal-Karita’ fi ħdan l-Arċidjoċesi qed jorganizza biex joffri ikel ta’ kuljum lil persuni u familji fil-bżonn. Għaldaqstant, min jixtieq jgħin f’din l-inizjattiva, jista’ jġib affarijiet ta’ ikel u jpoġġihom ħdejn l-altar tal-Kunċizzjoni. Min irid jista’ wkoll jagħmel offerta ta’ flus għall-istess skop fl-envelopes li hemm ħdejn il-kaxxi li hawn ħdejn l-altar u jixħet l-offerta fil-kaxxi jew jgħaddiha lil xi ħadd mis-saċerdoti.

Adorazzjoni u talb għall-Vokazzjonijiet

Is-Sibt li ġej, 14 ta’ Diċembru, fis-Seminarju Tal-Virtù, ir-Rabat, se ssir adorazzjoni u quddiesa b’talb għall-vokazzjonijiet saċerdotali. Għal min jixtieq jattendi, l-adorazzjoni tibda fis-6.00pm.

Kunċert tal-Milied

Is-Sibt 21 ta’ Diċembru, fil-Knisja Arċipretali se ikun hawn Kunċert tal-Milied mill-Joy Gospel Singers. Miegħu se jingħaqdu madwar tletin tifel u tifla mill-parroċċa tagħna. Inħeġġiġkom biex tattendu u tistiednu l-ħbieb tagħkom ukoll. Id-dħul se jkun bla ħlas; pero’ fi tmiem il-kunċert wieħed huwa mistieden jagħmel offerta b’risq id-Dar tal-Providenza.

Ġabra Speċjali

Fl-okkażjoni tal-ewwel Ħadd tax-Xahar, issir il-ġabra speċjali għall-bżonnijiet tal-knisja b’mod speċjali għall-ispejjeż li jsiru fil-festi li ġejjin tal-Milied u l-proġett ta’ toilets ġodda li issa jinsabu lesti. Nirringrazzjawkom tal-għajnuna tagħkom li dejjem tagħtu permezz tal-offerti tagħkom.

Nitolbu għal Grace Mizzi u Emanuel Agius li għaddew għall-ħajja ta’ dejjem. Agħtihom, O Mulej, il-mistrieħ ta’ dejjem. Kellna wkoll funeral tat-tarbija Edmund Galea Xuereb.

Bidu tal-Avvent

IlĦadd (1/12) fil-quddiesa tad-9.30am isir it-tberik tal-Girlanda tal-Avvent. It-tfal huma mistiedna jġibu l-girlanda tagħhom biex titbierek waqt il-quddiesa.

Wara nofsinhar, il-Life Network Foundation se torganizza Ċelebrazzjoni tal-Ħajja bl-isem ‘March for Life’ fil-Belt Valletta. Din l-attività tibda fit-3.00pm.

Festa tal-Immakulata Kunċizzjoni

It-Tlieta (3/12) fil-Knisja ta’ Sidtna Marija tal-Anġli se jkun hemm quddiesa fis-6.00pm fl-okkażjoni tal-Festa tal-Immakulata Kunċizzjoni li se niċċelebrawha nhar il-Ħadd 8 ta’ Diċembru.

Laqgħa għall-Għarajjes

L-Erbgħa (4/12) se ssir il-laqgħa għall-għarajjes li se jiżżewġu s-sena d-dieħla. F’din il-laqgħa l-għarajjes jingħataw informazzjoni dwar il-preparamenti meħtieġa li jridu jsiru qabel it-tieġ. Il-laqgħa se ssir fis-Santwarju tal-Qalb ta’ Ġesù, fis-7.30pm.

Laqgħa bi preparazzjoni għall-Ġublew

Il-Ħamis (5/12) ikollna l-aħħar laqgħa bi preparazzjoni għall-Ġublew 2025 bit-tema “Gwida għall-familja fis-sena tal-Ġublew”. Il-laqgħa ssir fil-Knisja Arċipretali wara l-quddiesa ta’ filgħaxija.

Quddies, adorazzjoni u taħdita

Il-Ġimgħa (6/12), l-Ewwel Ġimgħa tax-Xahar, ikun hawn ħin ta’ adorazzjoni quddiem Ġesù Ewkaristija minn wara l-quddiesa tas-7.00am.

Nhar il-Ġimgħa li ġej ukoll, fis-7.00pm, fil-Knisja Arċipretali se ssir taħdita dwar San Ġużepp min-Nutar Dr Philip Ellul, li matulha se ssir ukoll introduzzjoni għall-pubblikazzjoni spiritwali bil-Malti li ġġib l-isem “San Ġużepp f’Kitbieti”. Kulħadd huwa mistieden biex jattendi, speċjalment dawk li huma devoti ta’ San Ġużepp. 

Bidu għall-Festi tal-Milied u quddiesa speċjali għaż-żgħażagħ

Il-Ħadd li ġej (8/12), fis-6.15pm se ssir attività organizzata mill-Kunsill Lokali f’Misraħ San Filep, li tagħti bidu għall-Festi tal-Milied. Waqt din l-attività se jsir kant ta’ għanjiet tal-Milied, messaġġ mis-Sindku u l-Arċipriet, u ssir il-mixgħela tas-Sigra tal-Milied. Kulħadd huwa mistieden.

Il-Ħadd ukoll (8/12), wara din l-attività, nistiednu liż-żgħażagħ kollha għall-quddiesa tas-7.00pm li se tkun animata b’mod speċjali għalihom f’dan iż-żmien li jippreparana għall-Milied.

Ġabra Speċjali

Fl-okkażjoni tal-ewwel Ħadd tax-Xahar, issir il-ġabra speċjali għall-bżonnijiet tal-knisja. Nirringrazzjawkom tal-għajnuna tagħkom li dejjem tagħtu permezz tal-offerti tagħkom.

Festa ta’ Kristu Sultan

Il-Ħadd filgħaxija niċċelebraw il-festa ta’ Kristu Sultan. Monsinjur Arċisqof se jmexxi ċelebrazzjoni ta’ talb fil-Bażilika ta’ Kristu Re, r-Raħal Ġdid, fil-5.00pm. F’din l-okkażjoni l-Arċisqof jagħti l-messaġġ tiegħu.

Laqgħa oħra bi preparazzjoni għall-Ġublew

Il-Ħamis (28/11) fil-Knisja Arċipretali, wara l-quddiesa ta’ filgħaxija, ikollna laqgħa oħra bi preparazzjoni għall-Ġublew 2025. Il-laqgħa se tkun imsejsa fuq is-suġġett ‘It-Tama fil-kitbiet tal-Papa Benedittu u l-Papa Franġisku’.

Laqgħa għall-koppji miżżewġin

Il-Ġimgħa (29/11), se ssir laqgħa għall-koppji miżżewġin, fis-7.00pm, fis-sala taħt l-Uffiċċju Parrokkjali, organizzata mill-Kummissjoni Familja. Il-kelliem se jkun l-Arċipriet.

L-Avvent u t-tberik tal-Girlanda

Minn nhar il-Ħadd li ġej (1/12) nagħtu bidu għaż-żmien tal-Avvent bi tħejjija għall-Milied.

Matul is-Sibtijiet tal-Avvent, fil-5.00pm qabel il-quddiesa, nitolbu flimkien it-talba tal-Għasar. L-Għasar huwa t-talba uffiċjali tal-Knisja għal filgħaxija.   

Fil-quddiesa tad-9.30am tal-Ħadd isir it-tberik tal-Girlanda tal-Avvent. It-tfal huma mistiedna jġibu l-girlanda tagħhom biex titbierek waqt il-quddiesa.

Laqgħa għall-għarajjes

L-Erbgħa 4 ta’ Diċembru se ssir laqgħa għall-għarajjes li se jiżżewġu s-sena d-dieħla (2025). Il-laqgħa se ssir fis-Santwarju tal-Qalb ta’ Ġesù fis-7.30pm.

Donazzjonijiet Hospice Movement

Intom u ħerġin mill-knisja, membri volontarji ta’ Hospice Movement se jkunu qed jilqgħu donazzjoni b’risq is-servizzi u l-assistenza li l-Hospice joffri lil ħafna persuni li jkunu jeħtieġu l-għajnuna minħabba mard tal-kanċer u mard serju ieħor. Il-Hospice joffri s-servizzi tiegħu mingħajr ħlas, għaldaqstant kull donazzjoni min-naħa tagħna tkun ta’ għajnuna kbira u hija ferm apprezzata.

Nitolbu għal oħtna Carmen Cortis li għaddiet għall-ħajja ta’ dejjem u għal ħutna mejtin. Agħtihom Mulej il-mistrieħ ta’ dejjem.

Adorazzjoni

It-Tlieta (19/11) fil-kappella għand is-sorijiet ikun hemm Adorazzjoni animata mis-Superjur Joe Fenech fl-10.00am.

Quddies għar-Romol u Laqgħa Ġublew tat-Tama

Il-Ġimgħa (22/11), għall-quddiesa tas-6.30pm huma mistiedna r-romol li tilfu l-għeżież tagħhom. Min jixtieq jista’ jikteb isimhom fis-sagristija biex jissemmew fil-bidu tal-quddiesa.

Wara l-quddiesa, fil-Knisja Arċipretali, ikollna t-tielet laqgħa bi preparazzjoni għas-Sena tal-Ġublew tat-Tama. It-tema ta’ din il-laqgħa se tkun “Il-Pellegrinaġġ u l-Mixja tal-Ħajja Nisranija”.

Vestizzjoni Abbatini

Is-Sibt (23/11) ħdax-il tifel u tifla mill-parroċċa tagħna se jagħmlu l-Vestizzjoni tal-Abbatini fil-quddiesa tas-6.30pm fil-Knisja Arċipretali. Nawguraw lil dawn it-tfal li se jingħaqdu mal-grupp tal-abbatini u nitolbu għalihom.

Festa Kristu Sultan

Il-Ħadd (24/11) nagħlqu s-Sena Liturġika tal-Knisja bil-festa ta’ Kristu Sultan. Mons. Arċisqof se jmexxi ċelebrazzjoni ta’ talb fil-Bażilika ta’ Kristu Re, Raħal Ġdid, fil-5.00pm, fejn jagħti wkoll il-messaġġ tiegħu.  

Assemblea Djoċesana

Il-Ħamis u l-Ġimgħa (21/11 u 22/11) se tiltaqa’ l-Assemblea Djoċesana msejħa minn Monsinjur Arċisqof. Din l-Assemblea li ssir kull sena, iġġib flimkien mal-Arċisqof rappreżentanti ta’ għaqdiet, movimenti u gruppi pastorali fi ħdan il-Knisja Maltija. Il-laqgħat se jsiru fis-sala taċ-ĊAK Birkirkara, fis-6.00pm. Nitolbu biex din l-Assemblea tħalli frott fil-ħidma pastorali tal-Knisja f’Malta.

Nitolbu għall-għeżież tagħna mejtin u għall-mejtin kollha. Agħtihom, O Mulej, il-mistrieħ ta’ dejjem.

San Martin

Il-Ħadd, 10 ta’ Novembru fil-quddiesa tad-9.30am niċċelebraw il-festa ta’ San Martin għat-tfal u l-familji. Fl-10.00am ikun hemm quddiesa fiċ-ċimiterju ta’ Sant’Andrija u wara jsir it-tberik tal-oqbra.

Laqgħa Grupp Kelma tal-Ħajja

It-Tlieta (12/11) jiltaqa’ l-Grupp tal-Kelma tal-Ħajja fid-9.30am fis-Sala għand is-Sorijiet.

Laqgħa Grupp Padre Pio

L-Erbgħa (13/11) fis-6.00pm fil-Knisja Arċipretali jkun hawn il-laqgħa tal-Grupp ta’ San Padre Pio.

Laqgħa għall-adolexxenti

L-Erbgħa (13/11), fiċ-Ċentru taż-Żgħażagħ Ta’ Warda se jkun hemm l-ewwel laqgħa  għall-adolexxenti li rċevew il-Griżma tal-Isqof, jiġifieri dawk li twieldu fis-sena 2012 (Form 2). Il-laqgħa tibda fis-7.00pm fiċ-Ċentru Ta’ Warda stess. Aktar informazzjoni minn fuq in-noticeboards tal-knisja jew ikkuntattjaw lil Fr Mario.

Laqgħa bi preparazzjoni għall-Ġublew

Il-Ġimgħa (15/11), ikollna t-tieni laqgħa bi preparazzjoni għall-Ġublew tat-Tama fis-sena 2025 imħabbar mill-Papa Franġisku. Il-laqgħa se ssir fil-Knisja Arċipretali wara l-quddiesa ta’ filgħaxija. It-tema ta’ din il-laqgħa se tkun “It-Tama fl-Iskrittura”. Il-laqgħa tieħu madwar 20 minuta.

Kunċert tal-Milied

Infakkru lil dawk il-ġenituri li jixtiequ li uliedhom jieħdu sehem fil-kunċert tal-Milied mill-Kor Joy Gospel Singers, li se jsir nhar is-Sibt 21 ta’ Diċembru, ġentilment huma mitluba li jimlew formola fis-sagristija.

Intenzjonijiet tal-Quddies

Dawk li jixtiequ jiktbu l-intenzjonijiet tal-quddies għax-xhur ta’ bejn Jannar u Ġunju (2025), huma mitluba jidħlu fis-sagristija u jkellmu lil xi ħadd mis-saċerdoti.

Ġabra għall-Knisja

Il-ġabra speċjali li saret nhar il-Ħadd li għadda għall-knisja kienet ta’ €1,774. Grazzi tal-ġenerożità tagħkom.

‘High Tea’

Se jsir High Tea b’risq il-missjoni li żgħażagħ mill-parroċċa se jagħmlu fil-Peru’, nhar il-Ħadd li ġej, 17 ta’ Novembru fit-3.00pm, fis-Sala għand is-Sorijiet. Bookings mis-sagristija.

Nitolbu għal oħtna Filippa Bartolo li għaddiet għall-ħajja ta’ dejjem u għall-mejtin kollha. Agħtihom, O Mulej, il-mistrieħ ta’ dejjem.

Quddiesa fiċ-Ċimiterju

Il-Ħadd, fl-4.00pm ikun hemm quddiesa fiċ-ċimiterju tal-Qalb ta’ Ġesu’ u wara jsir it-tberik tal-oqbra. Matul ix-xahar ta’ Novembru, iċ-Ċimiterju tal-Qalb ta’ Ġesu’ jkun miftuħ kuljum bejn is-7.00am u t-3.30pm. Waqt li nirringrazzjaw li min qed jieħu l-inkarigu li jiftaħ u jara li l-post jinżamm nadif b’mod volontarju, napprezza ħafna l-koperazzjoni ta’ kulħadd biex nieħdu ħsieb li jibqa’ nadif kif jixraq. 

Laqgħat bi preparazzjoni għall-Ġublew

Mill-Ħamis li ġej, 7 ta’ Novembru, se jibdew laqgħat ta’ tagħlim bi preparazzjoni għall-Ġublew tat-Tama fis-sena 2025 imħabbar mill-Papa Franġisku. Dawn il-laqgħat se jkunu darba fil-ġimgħa matul Novembru u l-bidu ta’ Diċembru. Il-laqgħat se jsiru fil-Knisja Arċipretali wara l-quddiesa ta’ filgħaxija. It-tema tal-ewwel laqgħa se tkun ”It-Tifsira tal-Ġublew”. Il-laqgħa tieħu madwar 20 minuta.

Festa ta’ San Martin

Il-Ħadd, 10 ta’ Novembru, fil-quddiesa tad-9.30am niċċelebraw il-festa ta’ San Martin. Inħeġġu lill-familji bit-tfal biex jattendu. Nistiednu lit-tfal biex iġibu magħhom għotjiet tal-ikel biex ngħinu familji fil-bżonn.

Quddies u tberik tal-oqbra

Il-Ħadd, 10 ta’ Novembru fl-10.00am, issir quddiesa fiċ-ċimiterju ta’ Sant’Andrija u wara jsir it-tberik tal-oqbra.

Grupp ġdid għall-adolexxenti

Fiċ-Ċentru taż-Żgħażagħ Ta’ Warda se nibdew grupp ġdid għall-adolexxenti li rċevew il-Griżma tal-Isqof, jiġifieri dawk li twieldu fis-sena 2012 (Form 2). L-ewwel laqgħa għal dan il-grupp se ssir nhar l-Erbgħa 13 ta’ Novembru fis-7.00pm fiċ-Ċentru Ta’ Warda. Aktar informazzjoni minn fuq in-noticeboards tal-knisja jew ikkuntattjaw lil Fr Mario.

Kunċert mill-Kor Joy Gospel

F’Diċembru qrib il-Milied (is-Sibt 21 ta’ Diċembru) il-Kor Joy Gospel Singers se jagħtu kunċert fil-Knisja Arċipretali li se jkun b’riżq id-Dar tal-Providenza. Hija xewqa tad-direttriċi tal-Kor li tinvolvi t-tfal tal-parroċċa f’dan il-kunċert. Jekk hawn xi ġenituri li jixtiequ li uliedhom jieħdu sehem huma mitluba li jieħdu formola mis-sagristija.

Coffee Morning

It-Tlieta 12 ta’ Novembru se jsir coffee morning b’riżq il-knisja, fid-9.30am, fis-Sala tas-Sorijiet. Min jixtieq jattendi jkellem lil xi ħadd mill-membri tal-grupp tal-fundraising.

Nitolbu għal oħtna Carmen Balzan, li għaddiet għall-ħajja ta’ dejjem, u għall-mejtin kollha. Agħtihom, O Mulej, il-mistrieħ ta’ dejjem.

Ħinijiet tal-Quddies

Issa li qlibna għall-ħin tax-xitwa, infakkru li l-ħin tal-quddies filgħaxija ma jinbidilx.

Laqgħa dwar is-Saħħa Mentali

It-Tlieta 29 ta’ Ottubru, fis-7.30pm, il-Kummissjoni Djakonija flimkien mal-Occupational Therapist Maria Daniela Farrugia u Dr Antonella Sammut, konsulenta tas-saħħa pubblika, se jorganizzaw laqgħa ta’ formazzjoni għall-adulti bl-isem “Mental Health Matters”. Il-laqgħa se ssir fis-sala tas-sorijiet. F’din il-laqgħa, il-professjonisti se jgħinuna nagħrfu kif għandna nieħdu ħsieb is-saħħa mentali tagħna u kif għandna ngħinu lil min hu għaddej minn żminijiet diffiċli.

Festa tal-Qaddisin Kollha

Il-Ġimgħa 1 ta’ Novembru, Festa tal-Qaddisin Kollha u l-Ewwel Ġimgħa tax-Xahar, ikun hawn adorazzjoni fis-skiet minn wara l-quddiesa tas-7.00am li tintemm bil-Barka Sagramentali qabel il-quddiesa tat-8.00am. Fis-6.00pm ikollna quddiesa għat-tfal fil-Knisja Arċipretali. Nistiednu lit-tfal jiġu lebsin tal-qaddis/a favorit/a tagħhom jew b’ilbies ikkulurit. Wara jkun hemm attività varjata għat-tfal. Navżaw li din se tkun l-unika quddiesa filgħaxija u ma jkunx hawn quddiesa fis-6.30pm. Navżaw ukoll li nhar il-Ġimgħa l-Uffiċċju Parrokkjali se jkun magħluq.

L-Għid tal-Imwiet

Is-Sibt 2 ta’ Novembru, niċċelebraw l-Għid tal-Imwiet. Niftakru f’ħutna l-mejtin. Il-quddies filgħodu jibda fis-6.00am u jkompli kull nofs siegħa bl-aħħar quddiesa tkun fit-8.00am. Fis-5.15pm issir konċelebrazzjoni biex nitolbu għal ħutna l-mejtin, b’mod speċjali dawk li mietu minn Novembru tas-sena l-oħra ’l hawn. Inħeġġu lill-qraba tagħhom biex jieħdu sehem f’din il-quddiesa.

Quddies fiċ-Ċimiterju

Il-Ħadd li ġej, 3 ta’ Novembru, fl-4.00pm ikun hemm quddiesa fiċ-ċimiterju tal-Qalb ta’ Ġesu’ u wara jsir it-tberik tal-oqbra. It-tberik taċ-ċimiterju ta’ Sant’Andrija jsir il-Ħadd ta’ wara, 10 ta’ Novembru, fl-10.00am.

Matul ix-xahar ta’ Novembru, iċ-ċimiterju tal-Qalb ta’ Ġesù jkun miftuħ kuljum mis-7.00am sat-3.30pm.

Ġabra b’risq il-Missjoni

Il-ġbir li sar fil-quddies is-Sibt u l-Ħadd li għadda fil-Knisja Arċipretali u fil-knejjes l-oħra b’riżq il-Missjoni kien ta’ €4,600.

Priedka tal-Milied

Infakkru li dawk it-tfal subien u bniet li jixtiequ jagħmlu l-prietka tal-Milied, il-ġenituri tagħhom huma mitluba li jiktbuhom fis-sagristija.

Bake Sale b’risq il-Missjoni

Illum fuq iz-zuntier qed isir Bake Sale (bejgħ ta’ kejkijiet u ħelu) b’risq il-missjoni li grupp ta’ żgħażagħ mill-parroċċa tagħna se jagħmel fil-Perù. Ħaġa sabiħa li ngħinu f’din l-inizjattiva.

Nitolbu għal Marion Vella, Saviour Cilia u Frances Camilleri, li għaddew għall-ħajja ta’ dejjem. Agħtihom, Mulej, il-mistrieħ ta’ dejjem.  

Rużarju fil-Beraħ

Il-Leġjun ta’ Marija se jorganizza Rużarju fil-beraħ minn għada t-Tnejn (21/10) sa nhar il-Ġimgħa li ġej fil-pjazza ta’ Ħal Dwieli. Ir-Rużarju jibda fis-6.00pm u l-Ġimgħa jkun hemm quddiesa fil-pjazza wara r-Rużarju. Inħeġġu lil min jista’ sabiex jattendi, b’mod speċjali lil dawk li joqogħdu f’din iż-żona.

Adorazzjoni

It-Tlieta (22/10) fl-10.00am ikun hemm l-Adorazzjoni mmexxija mis-Superjur Joe Fenech fil-kappella ta’ San Ġużepp għand is-Sorijiet.

Laqgħa għall-Koppji Miżżewġin

Il-Ġimgħa 25 ta’ Ottubru, se ssir laqgħa għall-koppji miżżewġin, fis-7.00pm, fis-sala taħt l-Uffiċċju Parrokkjali, organizzata mill-Kummissjoni Familja. Il-kelliem se jkun Fr Ivan Attard OP.

Kunċert Kommemorattiv mill-Banda San Filep

Il-Ġimgħa wkoll se jittella’ Kunċert Kommemorattiv mill-Għaqda Każin Banda San Filep fil-Knisja Arċipretali. Min jixtieq jattendi huwa ġentilment mitlub li jkun fil-knisja fis-7.30pm. Kulħadd huwa mistieden.

Festa tal-Konsagrazzjoni tal-Knisja

Nhar il-Ħadd li ġej 29 ta’ Ottubru niċċelebraw il-festa tal-Konsagrazzjoni tal-Knisja. Festa li tfakkarna li l-Knisja hija aħna, il-poplu ta’ Alla, li niġu f’dan il-post qaddis biex nagħtu qima lil Alla. Il-quddiesa tal-5.15pm is-Sibt tkun kantata u l-Ħadd il-quddiesa tad-9.30am tkun animata għat-tfal b’din it-tema.  

Festa tal-Qaddisin Kollha

Il-Ġimgħa 1 ta’ Novembru, Festa tal-Qaddisin Kollha, se ssir quddiesa għat-tfal kollha fil-Knisja Arċipretali fis-6.00pm. Nistiednu lit-tfal jiġu lebsin tal-qaddis/a favorit/a tagħhom jew b’ilbies abjad. Wara l-quddiesa jkun hemm attività varjata għalihom fuq iz-zuntier.

Ġabra għall-Missjoni

Il-Knisja, mad-dinja kollha, illum qed tiċċelebra l-Ġurnata Missjunarja. L-Opri Missjunarji Pontifiċji (illum magħrufin bħala MISSIO) jgħinu diversi missjunarji, kemm Maltin u oħrajn, li jitolbu għajnuna biex jibnu knejjes, iżommu skejjel, iwaqqfu sptarijiet u jikkuraw morda, jassistu u jilqgħu fi djar apposta familji u tfal abbandunati u jipprovdulhom il-bżonnijiet l-aktar essenzjali. Għaldaqstant, bil-ġbir li jsir fil-quddies ta’ dan it-tmiem il-ġimgħa, inkunu qed ngħinu din il-ħidma missjunarja tal-Knisja f’dawk il-pajjiżi fejn hemm bżonn ħafna assistenza.

Nitolbu għal ħutna Antonia Attard u Noè Farrugia, li għaddew għall-ħajja ta’ dejjem. Agħtihom, O Mulej, il-mistrieħ ta’ dejjem.

Festa ta’ San Franġisk

Fl-okkażjoni tal-Festa ta’ San Franġisk u Jum il-Ħolqien, qed nistiednu lit-tfal biex iġibu l-pets u l-annimali tagħhom biex jitbierku fil-quddiesa tad-9.30am li se tkun iċċelebrata fuq iz-zuntier tal-knisja. Din l-attività qed issir b’kollaborazzjoni mal-Kunsill Lokali.

Laqgħat ta’ Katekeżi

Minn nhar it-Tnejn (14/10) jibdew il-laqgħat ta’ Katekeżi fis-Sala tas-Sorijiet, fis-7.30pm. Dawn il-laqgħat, immexxija minn membri tal-Mixja Neokatekumenali, ikomplu kull nhar ta’ Tnejn u nhar ta’ Ħamis fil-ġimgħat li ġejjin.

Qrar fil-Museum tas-Subien

It-Tlieta (15/10) fis-7.00pm, fil-MUSEUM tas-Subien ikun hemm il-qrar għas-subien li se jersqu għas-Sagrament tal-Griżma.

Seminar mis-Sezzjoni Femminili tal-MUSEUM

Il-Ħamis 17 ta’ Ottubru mid-9.15am san-12.30pm se jkun qed jiġi organizzat seminar għal kulħaddU imtella’ mis-sezzjoni femminili tal-MUSEUM. Dan se jsir fil-qasam tal-MUSEUM tas-Siġġiewi. Se jkun hemm taħdita fuq it-Tama Nisranija u oħra fuq il-wellbeing tagħna. Inħeġġu lil dawk kollha li jistgħu sabiex jattendu.

Qrar bi preparazzjoni għas-Sagrament tal-Griżma

Il-Ġimgħa filgħaxija mis-6.00pm sat-8.00pm u l-għada s-Sibt mit-8.00am sal-10.00am ikun hawn servizz ta’ qrar għall-ġenituri u parrini bi preparazzjoni għas-sagrament tal-Griżma.

Ċelebrazzjoni tas-Sagrament tal-Griżma

Nhar is-Sibt (19/10) fl-4.30pm jiġi ċċelebrat is-Sagrament tal-Griżma għall-bniet. Il-Ħadd (20/10) fid-9.15am jirċievu l-Griżma s-subien. Nifirħu lil dawk li se jirċievu dan is-Sagrament u nitolbu għalihom.

Ġurnata Missjunarja

Il-Ħadd li ġej, 20 ta’ Ottubru, il-Knisja tiċċelebra l-Ġurnata Missjunarja. L-Opri Missjunarji Pontifiċji (illum magħrufin bħala MISSIO) jgħinu diversi missjunarji, kemm Maltin u oħrajn, li jitolbu għajnuna biex jibnu knejjes, iżommu skejjel, iwaqqfu sptarijiet u jikkuraw morda, jassistu u jilqgħu fi djar apposta familji u tfal abbandunati u jipprovdulhom il-bżonnijiet l-aktar essenzjali. Għaldaqstant, bil-ġbir li jsir fil-quddies is-Sibt u l-Ħadd li ġej, inkunu qed ngħinu din il-ħidma missjunarja tal-Knisja f’dawk il-pajjiżi fejn hemm bżonn ħafna assistenza.

Ġabra Speċjali

Il-ġbir li sar fil-quddies nhar is-Sibt u l-Ħadd li għadda b’riżq il-knisja kien ta’ €1,820. Nirringrazzjawkom dejjem tal-għajnuna u s-sostenn li tagħtu lill-knisja.

Nitolbu għal ħutna Roderick Camilleri u Dominic Spiteri, li għaddew għall-ħajja ta’ dejjem. Agħtihom, O Mulej, il-mistrieħ ta’ dejjem.

Festa tal-Madonna tar-Rużarju

Il-Ħadd, 6 ta’ Ottubru niċċelebraw il-festa tal-Madonna tar-Rużarju. Fl-4.30pm tingħad it-talba tal-Għasar, fil-5.00pm quddiesa kantata bis-sehem tal-Kor Parrokkjali u wara purċissjoni bix-xbiha tal-Madonna akkumpanjata bit-talba tar-Rużarju. Wara l-purċissjoni jkun hawn il-quddiesa tas-7.00pm.

Il-Papa Franġisku qiegħed jagħmlilna sejħa biex nhar it-Tnejn 7 ta’ Ottubru 2024, Festa tal-Madonna tar-Rużarju, ikun Jum ta’ Talb u Sawm għall-Paċi fid-dinja. Inħeġġukom tilqgħu dan l-appell tal-Papa u flimkien nissieħbu miegħu f’din l-intenzjoni fit-talb tagħna.

Laqgħa Grupp Kelma tal-Ħajja

It-Tlieta 8 ta’ Ottubru, fid-9.30am jiltaqa’ l-grupp tal-Kelma tal-Ħajja għand is-sorijiet.

Laqgħa Grupp San Padre Pio

L-Erbgħa 9 ta’ Ottubru jmiss il-laqgħa tal-Grupp ta’ San Padre Pio li tibda bir-rużarju fis-6.00pm u tkompli bil-quddiesa ta’ filgħaxija. Din il-laqgħa se tibda ssir kull tieni Erbgħa tax-xahar.

Qrar għall-bniet li ser jagħmlu l-Griżma ta’ l-Isqof

Il-Ħamis, 10 ta’ Ottubru, fis-5.45pm, fil-kappella ta’ San Ġużepp għand is-Sorijiet, se jsir il-qrar għall-bniet li se jersqu għas-Sagrament tal-Griżma.

Grupp l-Anġli Tagħna

Minn nhar il-Ġimgħa 11 ta’ Ottubru jerġa’ jibda jiltaqa’ l-grupp ‘L-Anġli Tagħna’ għal dawk il-persuni bi bżonnijiet speċjali. Il-grupp jiltaqa’ kull nhar ta’ Ġimgħa bejn il-5.00pm u s-7.00pm f’Villa San Filep.

Festa ta’ San Franġisk

Il-Ħadd 8 ta’ Ottubru, fl-okkażjoni tal-Festa ta’ San Franġisk, qed nistiednu lit-tfal biex iġibu l-pets u l-annimali tagħhom biex jitbierku fil-quddiesa tad-9.30am li se tkun iċċelebrata fuq iz-zuntier tal-knisja. Din iċ-ċelebrazzjoni qed issir b’kollaborazzjoni mal-Kunsill Lokali.

Quddies tal-5:30pm tal-Ħadd

Minn nhar il-Ħadd 13 ta’ Ottubru jibda jkun hawn il-quddiesa tal-5.30pm ta’ filgħaxija.

L-Ewwel Tqarbina

Id-dati tal-Ewwel Tqarbina għas-sena d-dieħla 2025 se jkunu s-Sibt 24 ta’ Mejju fl-4.30pm għall-bniet u l-Ħadd 25 ta’ Mejju fid-9.15am għas-subien.

Ġabra Speċjali

Fl-ewwel Ħadd tax-xahar issir il-ġabra speċjali għall-bżonnijiet tal-knisja. Nirringrazzjawkom tal-għajnuna tagħkom li dejjem tagħtu permezz tal-offerti tagħkom.

Nitolbu għal ħutna Agnese Azzopardi, Ġanni Tabone u Nikol Ciscaldi, li għaddew għall-ħajja ta’ dejjem. Agħtihom, O Mulej, il-mistrieħ ta’ dejjem.