Festa ta’ Sant’Anna u San Ġwakkin

Għada l-Ħadd (19/07) għall-quddiesa tal-familja tad-9.30am huma mistiedna b’mod speċjali n-nanniet b’rabta ma’ Jum in-Nanniet, qrib il-festa ta’ Sant’Anna u San Ġwakkin, li l-Knisja tfakkar fis-26 ta’ Lulju.

Adorazzjoni

It-Tlieta fl-10.00am ikun hemm l-Adorazzjoni mmexxija mis-Superjur Joe Fenech fil-kappella ta’ San Ġużepp għand is-Sorijiet.

Festa ta’ San Ġużepp

Matul din il-ġimgħa niċċelebraw il-festa ta’ San Ġużepp: 

• It-Tnejn (20/07) fit-7.45pm issir quddiesa għaż-żgħażagħ fuq iz-zuntier. Wara jsir il-ħruġ tal-vara min-niċċa u l-preżentazzjoni tat-trabi lil San Ġużepp.
• Il-Ħamis u l-Ġimgħa jkunu jiem tat-Tridu. Il-quddiesa tas-6.30pm tkun bil-prietka minn Dun Joseph Attard. Wara l-quddiesa tingħad il-kurunella, jitkantaw l-innu u l-antifona u tingħata l-Barka Sagramentali.
• Is-Sibt, l-aħħar jum tat-Tridu, fis-6.00pm isir l-Ewwel Għasar kantat u tingħad il-kurunella. Fis-6.30pm quddiesa bil-prietka tat-Tridu. Wara l-funzjoni tat-Tridu jitkanta t-Te Deum u tingħata l-Barka Sagramentali.
• Il-Ħadd, nhar il-Festa, fit-8.00am issir il-quddiesa solenni li se tkun immexxija mill-Arċipriet, bil-paniġierku minn Mons. Brendan Gatt. Il-quddiesa ta’ wara tkun fl-10.00am għat-tfal u l-familji. Fis-6.00pm ikun hawn quddiesa bil-kant li fiha jingħad l-Għasar. Fis-7.30pm toħroġ il-purċissjoni li tidħol lura fl-10.00pm u tagħlaq bl-antifona u l-Barka Sagramentali.

Ħdejn il-bieb il-kbir tal-knisja hemm fuljetti bil-programm sħiħ u miegħu hemm envelope biex wieħed jagħmel offerta għall-festa. 

Ilbies xieraq għall-Knisja

Nagħmlu appell biex matul il-jiem tas-sajf fil-knisja niġu lebsin b’ilbies xieraq, b’rispett u qima li jixirqu lid-Dar ta’ Alla.

Nitolbu għal ħutna Alfred Dalli, Vivienne Dimech u Rita Mifsud, li għaddew għall-ħajja ta’ dejjem. Agħtihom, O Mulej, il-mistrieħ ta’ dejjem.

Festa ta’ Sant’Anna u San Ġwakkin – Jum in-Nanniet

Il-Ħadd, 19 ta’ Lulju, b’rabta mal-festa ta’ Sant’Anna u San Ġwakkin, se niċċelebraw Jum in-Nanniet. Il-quddiesa tad-9.30am se tkun animata b’mod speċjali għal din l-okkażjoni. Nistiednu b’mod speċjali lin-nanniet biex jattendu għal din il-quddiesa flimkien mal-familji tagħhom.

Attivita’ għat-Tfal

It-Tlieta 21 ta’ Lulju se nkunu qed norganizzaw attivita’ tas-sajf għat-tfal minn Year 1 sa Year 6. L-attivita’, li se tkun tinkludi formazzjoni, talb u logħob, se ssir fiċ-Ċentru Ta’ Warda, mill-5.30pm sas-7.30pm. Dawk il-ġenituri li jixtiequ li uliedhom jattendu huma mitluba li jinkitbu fis-sagristija jew minn fuq il-paġna ta’ Facebook tal-parroċċa. 

Festa ta’ San Ġużepp

Ħdejn il-bibien tal-knisja hemm fuljetti bil-programm tal-Festa ta’ San Ġużepp li se niċċelebrawha l-Ħadd 26 ta’ Lulju. Mal-fuljett hemm envelope biex wieħed jagħmel offerta għall-festa. L-envelope bl-offerta tagħkom nitolbukom iġġibuh magħkom fil-knisja u titfgħuh fil-kaxxi li hawn ħdejn l-altar jew tgħadduh lil xi ħadd minna s-saċerdoti.

Nitolbu għal ħutna Saviour Cachia, Maria Grazia Osmond u Nicolai Micallef, li għaddew għall-ħajja ta’ dejjem. Agħtihom, O Mulej, il-mistrieħ ta’ dejjem. 

Kors ta’ Kana

Nerġgħu nfakkru lill-għarajjes li se jiżżewġu fis-sentejn li ġejjin u li għad iridu jagħmlu l-Kors ta’ Kana, li fil-parroċċa tagħna l-kors se jibda nhar it-Tlieta 6 ta’ Ottubru. Dawk il-koppji li jixtiequ aktar informazzjoni huma mitluba li jiġu fl-Uffiċċju Parrokkjali jew ikellmu lill-Arċipriet.

Offerta għall-Papa

Il-ġbir li sar il-Ħadd li għadda bħala Offerta għall-Papa laħaq is-somma ta’ €2,470. B’din il-ġabra, li ssir mad-dinja kollha fil-Knisja, il-Papa jkun jista’ jifrex il-ħidma tiegħu ta’ karita’.  

Nitolbu għal ħutna Phyllis Debono, Oleksander Afanasenko u John Farrugia, li għaddew għall-ħajja ta’ dejjem. Agħtihom, O Mulej, il-mistrieħ ta’ dejjem. 

Festa ta’ San Pietru u San pawl

It-Tnejn 29 ta’ Ġunju, niċċelebraw is-Solennità tal-Appostli San Pietru u San Pawl. Il-quddies ikun bħal ta’ matul il-ġimgħa.

Adorazzjoni

Il-Ħamis 2 ta’ Lulju ikun hawn l-adorazzjoni fis-6.00pm qabel il-quddiesa. L-intenzjoni waqt din l-adorazzjoni tkun għall-vokazzjonijiet saċerdotali u reliġjużi.

Talb għall-vokazzjonijiet

Il-Ġimgħa 3 ta’ Lulju, l-Ewwel Ġimgħa tax-Xahar, wara l-quddiesa tas-7.00am ikun hawn adorazzjoni fis-skiet quddiem Ġesù Sagramentat sa qabel il-quddiesa tat-8.00am. Dakinhar ukoll imħeġġin inkomplu nitolbu għall-vokazzjonijiet saċerdotali. 

Kors ta’ Kana

Infakkru lil dawk l-għarajjes li se jiżżewġu fis-sentejn li ġejjin li huwa meħtieġ li jagħmlu l-Kors ta’ Kana. Idealment dan il-kors isir sentejn qabel it-tieġ. Fil-parroċċa tagħna l-kors jibda f’Ottubru li ġej. Dawk il-koppji li jridu jibbukkjaw għalih u jixtiequ aktar informazzjoni huma mitluba li jiġu fl-Uffiċċju Parrokkjali jew ikellmu lill-Arċipriet.

Offerta ta’ San Pietru

Illum qed issir il-Ġabra magħrufa bħala l-“Offerta ta’ San Pietru”. B’din il-ġabra nkunu qegħdin ngħinu lill-Papa Franġisku biex ikun jista’ jifrex il-ħidmiet tiegħu bħala Ragħaj tal-Knisja Universali permezz ta’ għotjiet ta’ karità mad-dinja kollha, b’mod speċjali ma’ dawk milqutin minn xi emerġenza, diżastru naturali jew gwerra. Monsinjur Arċisqof iħeġġiġna biex inkunu ġenerużi u nuru l-għaqda tagħna mal-Papa. Għaldaqstant, il-ġbir kollu fil-quddies ikun għal dan il-għan.

Nitolbu għal ħutna Salvina Coleiro u Anna Magri, li għaddew għall-ħajja ta’ dejjem. Agħtihom, O Mulej, il-mistrieħ ta’ dejjem. 

Jum il-Missier

Qegħdin niċċelebraw Jum il-Missier, għalhekk nifirħu lill-missirijiet kollha u nitolbu għalihom. Il-quddiesa tad-9.30am tkun animata b’mod speċjali għal din l-okkażjoni. Inħeġġu lill-familji jattendu għaliha. Fl-okkażjoni ta’ Jum il-Missier, iċ-ċimiterju tal-Qalb ta’ Ġesù jkun miftuħ mis-7.00am sat-3.30pm.

Laqgħa Grupp Kelma tal-Ħajja

It-Tlieta 23 ta’ Ġunju jiltaqa’ l-Grupp tal-Kelma tal-Ħajja fid-9.30am għand is-Sorijiet.

Festa tal-Qalb Imqaddsa ta’ Ġesù

Il-Ġimgħa li ġej 26 ta’ Ġunju, niċċelebraw il-Festa tal-Qalb Imqaddsa ta’ Ġesù. Fil-5.00pm ikun ħawn ħin ta’ Adorazzjoni fis-skiet u fis-6.00pm nitolbu t-talba tal-għasar u ssir il-professjoni tal-fratelli l-ġodda fil-fratellanza tas-SSmu. Sagrament. Fis-6.30pm issir quddiesa kantata. Immedjatament wara toħroġ il-purċissjoni bl-Ewkaristija li se tgħaddi minn dawn it-toroq: Misraħ San Filep, Triq Sant’Antnin, Triq Mamo, Triq il-Kbira, Triq l-Isqof u Misraħ San Filep. Inħeġġu biex nipparteċipaw f’din il-purċissjoni b’qima lejn Ġesù Ewkaristija u nżejnu t-toroq bil-pjanti minn fejn se tgħaddi l-purċissjoni, kif kienet id-drawwa.  

Ringrazzjament

Nixtiequ nirringrazzjaw lil kull min ta s-sehem tiegħu biex kellna festa sabiħa u li tixraq lill-Qaddis Patrun tagħna San Filep. Nirringrazzjaw lil kull min ikkontribwixxa fil-ġbir li sar għall-festa. L-offerti li ngħataw fl-envelopes flimkien ma’ donazzjonijiet oħra kienu ta’ €6,400. Il-ġbir li sar fil-ħruġ min-niċċa (€2,718), matul il-ġranet tat-Tridu u nhar il-festa (€4,111) u ġabra waqt id-dħul (€1,402) laħaq is-somma totali ta’ €8,231.

Nitolbu għal ħutna Josephine Xuereb u Joseph Spiteri, u għall-missirijiet kollha li għaddew għall-ħajja ta’ dejjem. Agħtihom, O Mulej, il-mistrieħ ta’ dejjem.

Festa ta’ San Filep

Qed niċċelebraw il-Festa tal-Patrun tagħna San Filep. Il-Ħadd, 14/6 fit-8.00am, issir il-Quddiesa Konċelebrata Solenni tal-Festa, immexxija mill-Provinċjal tas-Salesjani Fr Eric Cachia SDB, bil-paniġierku minsuġ mill-Kanonku Dun Antoine Borg.

Fil-5.30pm quddiesa bis-Salmi tal-Għasar u fis-7.00pm tibda ħierġa l-Purċissjoni u tidħol lura fil-Knisja fl-10.30pm.

Adorazzjoni

It-Tlieta 16 ta’ Ġunju, fl-9.45am fil-kappella għand is-Sorijiet ikun hemm l-adorazzjoni li jmexxi s-Superjur Joe Fenech.

Preżentazzjoni tat-tfal u trabi

Il-Ħamis 18 ta’ Ġunju,  fil-Quddiesa tas-6.30pm issir il-preżentazzjoni tat-tfal u t-trabi. Peress li se tingħata tifkira żgħira, min se jattendi importanti li jinkiteb fis-sagristija.

Festa tal-Qalb Imqaddsa ta’ Ġesù

Il-Ġimgħa 19 ta’ Ġunju ssir il-Festa tal-Qalb Imqaddsa ta’ Ġesù fis-Santwarju. Fis-6.15pm tibda l-quddiesa u wara ssir purċissjoni madwar is-Santwarju. Il-Ġimgħa ta’ wara (26/06) issir il-festa fil-Knisja Arċipretali.

Jum il-Missier

Il-Ħadd li ġej 21 ta’ Ġunju, ikun Jum il-Missier. Il-quddiesa tad-9.30am tkun animata b’mod speċjali għal din l-okkażjoni. Inħeġġu lill-familji jattendu għaliha. Fl-okkażjoni ta’ Jum il-Missier, iċ-ċimiterju jkun miftuħ is-Sibt u l-Ħadd mis-7.00am sat-3.30pm.

Offerta għall-Festa

Nagħmlu appell biex ilkoll tagħtu s-sehem tagħkom għall-ispejjeż tal-festa. L-offerta tagħkom tistgħu titfgħuha fil-kaxxi li hawn ħdejn l-altar. Nirringrazzjaw lil kull min diġa’ għamel offerta għall-festa.

F’isem is-saċerdoti u l-Kunsill Pastorali Parrokkjali, nawgura l-festa t-tajba lilkom u lill-familji tagħkom.

Nitolbu għal ħuna Joseph Fenech, li għadda għall-ħajja ta’ dejjem. Agħtih, Mulej, il-mistrieħ ta’ dejjem.

Festa ta’ San Filep

• Il-Ħadd (7/6) nagħtu bidu għall-festa bil-ħruġ tal-istatwa ta’ San Filep min-niċċa. Il-ħruġ isir wara l-quddiesa tas-6.30pm.
• It-Tnejn: fil-5.30pm, Quddiesa speċjali għat-tfal. It-tfal huma mħeġġa jġibu għotjiet tal-ikel għall-familji fil-bżonn tal-parroċċa tagħna. Wara jkollhom logħob fil-qasam tal-MUSEUM tas-Subien. Ma jkunx hawn quddiesa tas-6.30pm. Fit-7.45pm, Quddiesa għaż-żgħażagħ fuq iz-zuntier tal-Knisja.
• It-Tlieta: fl-10.00am, quddiesa għall-morda u l-anzjani. Fis-6.30pm, quddiesa għall-koppji u l-familji. Mistiedna b’mod speċjali dawk il-koppji li żżewġu mis-sena l-oħra ’l hawn. Fis-7.30pm, Taħdita Kulturali fuq l-Arkivji Parrokkjali tal-parroċċa tagħna. It-taħdita se ssir minn Mons. Frans Bonnici. 
• L-Erbgħa, il-Ħamis u l-Ġimgħa: Jiem tat-Tridu, skont kif indikat fil-programm. Il-prietki tat-Tridu se jsiru mill-Kanonku Patri Reno Muscat, Dumnikan.
• Is-Sibt: fit-8.00am Quddiesa kantata tat-TE DEUM. Fil-5.15pm, quddiesa u immedjatament wara toħroġ purċissjoni mill-Knisja Arċipretali għall-Knisja tal-Anġli minn fejn tibda l-purċissjoni tat-Translazzjoni bir-Relikwa ta’ San Filep, segwita mill-Kant tal-Għasar. Fit-8.00pm ikun hawn quddiesa. 
• Il-Ħadd: Jum il-Festa, fit-8.00am, issir il-Quddiesa Konċelebrata Solenni tal-Festa, immexxija mill-Provinċjal tas-Sależjani Patri Eric Cachia SDB. Il-quddies ta’ wara jkunu fl-10.00am u fil-11.00am. Fil-5.30pm, Għasar fil-quddiesa u fis-7.00pm tibda ħierġa l-Purċissjoni, li tidħol lura fil-Knisja fl-10.30pm. 

Preżentazzjoni tat-tfal u tat-trabi

Il-Ħamis 18 ta’ Ġunju, fil-Quddiesa tas-6.30pm issir il-preżentazzjoni tat-tfal u t-trabi li twieldu mis-sena l-oħra ’l hawn. Dawk li jixtiequ jattendu huma mitluba li jinkitbu fis-sagristija jew iwieġbu l-email li jirċievu mill-parroċċa.

Ġabra Speċjali għall-Festa

Ikun apprezzat jekk tikkontribwixxu €10 minn kull familja għall-festa, jew kemm tistgħu, skont il-mezzi tagħkom. Nirringrazzjawkom tas-sehem li tagħtu. L-offerta tagħkom b’riżq il-festa nitolbukom titfgħuha fil-kaxxi li hawn ħdejn l-altar jew tagħtuha lil xi ħadd minna s-saċerdoti. Min jixtieq jikseb kopja tal-fuljett IS-SLIEM, li fih hemm il-programm tal-festa, jista’ jieħu kopja minn ħdejn il-bibien tal-knisja.

Adorazzjoni

Il-Ġimgħa (5/6) l-Ewwel Ġimgħa tax-xahar dedikat lill-Qalb Imqaddsa ta’ Ġesù. Filgħodu jkun hawn adorazzjoni fis-skiet minn wara l-quddiesa tas-7.00am sat-8.00am. Dakinhar nitolbu għall-Vokazzjonijiet Saċerdotali.

Festa ta’ Corpus

Il-Ħadd (7/6) niċċelebraw il-festa tal-Ġisem u d-Demm ta’ Ġesù (Corpus). Filgħodu wara l-quddiesa tad-9.30am issir purċissjoni bis-sehem tat-Tfal li rċevew l-Ewwel Tqarbina. Il-purċissjoni se tgħaddi minn dawn it-toroq: Sant’Antnin, il-Knisja, il-Kbira, Campis, l-Isqof u Misraħ San Filep.

Bidu tal-Festa ta’ San Filep

Filgħaxija nagħtu bidu għall-festa ta’ San Filep bil-ħruġ tal-vara min-niċċa. Fis-6.30pm ikun hawn quddiesa li tiftaħ il-festi u fis-7.30pm isir il-ħruġ solenni.

Dakinhar fil-quddies kollu nagħmlu ġabra speċjali b’riżq il-festa.

Festa ta’ San Filep

• It-Tnejn (8/6), l-għada tal-ħruġ ta’ San Filep min-niċċa, nibdew il-programm tal-festa b’quddiesa għat-tfal fil-5.30pm. It-tfal huma mistiedna jġibu għotjiet tal-ikel biex joffruhom lill-familji fil-bżonn tal-parroċċa tagħna.
  
  Fit-7.45pm ikollna quddiesa bil-parteċipazzjoni taż-żgħażagħ fuq iz-zuntier.
  
• It-Tlieta (9/6) fl-10.00am ikollna quddiesa għall-morda u l-anzjani u fis-6.30pm ikollna quddiesa għall-familji, li għaliha huma mistiedna b’mod speċjali dawk il-koppji li żżewġu mis-sena l-oħra ‘l hawn. 
  
  Fis-7.30pm ikun hawn taħdita kulturali dwar l-Arkivji Parrokkjali minn Dun Frans Bonnici.

Din il-ġimgħa jitqassam il-fuljett tal-festa bil-programm sħiħ. Il-helpers li s-soltu jqassmu huma mitluba jieħdu l-kopji tagħhom mis-sagristija. Mal-fuljett se jitqassam l-envelop biex nagħmlu l-offerta tagħna għall-festa. L-envelop bl-offerta għall-festa nitolbukom iġġibuh magħkom u titfgħuh fil-kaxxi li hawn ħdejn l-artal jew tgħadduh lil xi ħadd mis-saċerdoti. L-offerti tagħkom huma apprezzati sabiex inkopru l-ispejjeż tal-festa.

Intenzjonijiet tal-Quddies

Dawk li jixtiequ jiktbu l-intenzjonijiet tal-quddies għax-xhur ta’ bejn Lulju u Diċembru, huma mitluba jidħlu fis-sagristija u jkellmu lil xi ħadd mis-saċerdoti. Minħabba li jkollna domanda kbira, fil-quddies ta’ filgħaxija u f’xi quddies ieħor jistgħu jittieħdu aktar minn intenzjoni waħda li dawn aktar tard jingħataw lill-saċerdoti missjunarji u b’hekk inkunu qegħdin ngħinuhom xi ftit.

L-Ewwel Tqarbina

Nifirħu lit-tfal tal-parroċċa tagħna li qed jagħmlu l-Ewwel Tqarbina. Nitolbu għalihom ħalli jkomplu jikbru fl-imħabba tagħhom lejn Ġesù Ewkaristija.

Trasport għall-Anzjani

Infakkru biex jekk hawn min għandu xi qraba anzjani li jixtiequ jiġu għall-quddiesa speċjali għalihom fil-ġimgħa tal-festa, nhar it-Tlieta 3 ta’ Ġunju fl-10.00am, u li għandhom bżonn trasport, xi ħadd mill-familjari jagħtuna isimhom u d-dettalji tagħhom fis-sagristija. Dawk ukoll li għandhom xi qraba emigranti li se jkunu fostna fil-jiem tal-festa, nitolbukom sabiex tgħaddu l-ismijiet tagħhom fis-sagristija.  

Reffiegħa għall-vara ta’ SanFilep

Dawk li jixtiequ jerfgħu fil-vara ta’ San Filep huma mitluba li jimlew formola li tinġabar mis-sagristija u magħha jippreżentaw kopja tal-karta tal-identità. Il-formoli mimlija għandhom jingħataw lill-Arċipriet.

Nitolbu għal ħuna Philip Cutajar, li għadda għall-ħajja ta’ dejjem. Agħtih, O Mulej, il-mistrieħ ta’ dejjem. Nitolbu wkoll għall-koppja Vella li tilfu t-tarbija tagħhom Ellie.

Adorazzjoni

It-Tlieta 19 ta’ Mejju, fil-Kappella ta’ San Ġużepp, fl-10.00am ikun hemm l-adorazzjoni li jmexxiha s-Superjur Joe Fenech.

L-Ewwel Tqarbina

Is-Sibt 23 ta’ Mejju fl-4.30pm ikollna l-Ewwel Tqarbina għall-bniet u l-għada l-Ħadd 24 għas-subien fid-9.15am. Nifirħu lil dawn it-tfal u nitolbu għalihom. Bi preparazzjoni għall-Ewwel Tqarbina, se jkun hawn il-qrar għall-ġenituri u għat-tfal, il-Ħamis u l-Ġimgħa mis-6.00pm sas-7.30pm u s-Sibt filgħodu mis-7.30am sal-10.00am.

Trasport għall-Anzjani għall-Quddiesa tal-Festa

Dawk li għandhom xi anzjani li jixtiequ jiġu għall-quddiesa speċjali għalihom fil-ġimgħa tal-festa, nhar it-Tlieta 9 ta’ Ġunju fid-9.30am, u għandhom bżonn trasport, nitolbu lil xi ħadd mill-familjari jagħtuna isimhom fis-Sagristija. Dawk ukoll li għandhom xi qraba emigranti li se jkunu fostna fil-jiem tal-festa nitolbuhom ukoll li jgħaddu l-ismijiet tagħhom fis-sagristija.

Reffiegħa għall-vara ta’ San Filep

Dawk li jixtiequ jerfgħu fil-vara ta’ San Filep huma mitluba li jimlew formola li tinġabar mis-sagristija u magħha jippreżentaw kopja tal-karta tal-identità. Il-formoli mimlija għandhom jingħataw lill-Arċipriet.

Nitolbu għal ħutna Ġużi Schembri, Alfred Vella, Sr Elvira Caruana, Joseph Ebejer u Lucia Guirey, li għaddew għall-ħajja ta’ dejjem. Agħtihom, O Mulej, il-mistrieħ ta’ dejjem.