Adorazzjoni

Il-Ġimgħa (5/6) l-Ewwel Ġimgħa tax-xahar dedikat lill-Qalb Imqaddsa ta’ Ġesù. Filgħodu jkun hawn adorazzjoni fis-skiet minn wara l-quddiesa tas-7.00am sat-8.00am. Dakinhar nitolbu għall-Vokazzjonijiet Saċerdotali.

Festa ta’ Corpus

Il-Ħadd (7/6) niċċelebraw il-festa tal-Ġisem u d-Demm ta’ Ġesù (Corpus). Filgħodu wara l-quddiesa tad-9.30am issir purċissjoni bis-sehem tat-Tfal li rċevew l-Ewwel Tqarbina. Il-purċissjoni se tgħaddi minn dawn it-toroq: Sant’Antnin, il-Knisja, il-Kbira, Campis, l-Isqof u Misraħ San Filep.

Bidu tal-Festa ta’ San Filep

Filgħaxija nagħtu bidu għall-festa ta’ San Filep bil-ħruġ tal-vara min-niċċa. Fis-6.30pm ikun hawn quddiesa li tiftaħ il-festi u fis-7.30pm isir il-ħruġ solenni.

Dakinhar fil-quddies kollu nagħmlu ġabra speċjali b’riżq il-festa.

Festa ta’ San Filep

• It-Tnejn (8/6), l-għada tal-ħruġ ta’ San Filep min-niċċa, nibdew il-programm tal-festa b’quddiesa għat-tfal fil-5.30pm. It-tfal huma mistiedna jġibu għotjiet tal-ikel biex joffruhom lill-familji fil-bżonn tal-parroċċa tagħna.
  
  Fit-7.45pm ikollna quddiesa bil-parteċipazzjoni taż-żgħażagħ fuq iz-zuntier.
  
• It-Tlieta (9/6) fl-10.00am ikollna quddiesa għall-morda u l-anzjani u fis-6.30pm ikollna quddiesa għall-familji, li għaliha huma mistiedna b’mod speċjali dawk il-koppji li żżewġu mis-sena l-oħra ‘l hawn. 
  
  Fis-7.30pm ikun hawn taħdita kulturali dwar l-Arkivji Parrokkjali minn Dun Frans Bonnici.

Din il-ġimgħa jitqassam il-fuljett tal-festa bil-programm sħiħ. Il-helpers li s-soltu jqassmu huma mitluba jieħdu l-kopji tagħhom mis-sagristija. Mal-fuljett se jitqassam l-envelop biex nagħmlu l-offerta tagħna għall-festa. L-envelop bl-offerta għall-festa nitolbukom iġġibuh magħkom u titfgħuh fil-kaxxi li hawn ħdejn l-artal jew tgħadduh lil xi ħadd mis-saċerdoti. L-offerti tagħkom huma apprezzati sabiex inkopru l-ispejjeż tal-festa.

Intenzjonijiet tal-Quddies

Dawk li jixtiequ jiktbu l-intenzjonijiet tal-quddies għax-xhur ta’ bejn Lulju u Diċembru, huma mitluba jidħlu fis-sagristija u jkellmu lil xi ħadd mis-saċerdoti. Minħabba li jkollna domanda kbira, fil-quddies ta’ filgħaxija u f’xi quddies ieħor jistgħu jittieħdu aktar minn intenzjoni waħda li dawn aktar tard jingħataw lill-saċerdoti missjunarji u b’hekk inkunu qegħdin ngħinuhom xi ftit.

L-Ewwel Tqarbina

Nifirħu lit-tfal tal-parroċċa tagħna li qed jagħmlu l-Ewwel Tqarbina. Nitolbu għalihom ħalli jkomplu jikbru fl-imħabba tagħhom lejn Ġesù Ewkaristija.

Trasport għall-Anzjani

Infakkru biex jekk hawn min għandu xi qraba anzjani li jixtiequ jiġu għall-quddiesa speċjali għalihom fil-ġimgħa tal-festa, nhar it-Tlieta 3 ta’ Ġunju fl-10.00am, u li għandhom bżonn trasport, xi ħadd mill-familjari jagħtuna isimhom u d-dettalji tagħhom fis-sagristija. Dawk ukoll li għandhom xi qraba emigranti li se jkunu fostna fil-jiem tal-festa, nitolbukom sabiex tgħaddu l-ismijiet tagħhom fis-sagristija.  

Reffiegħa għall-vara ta’ SanFilep

Dawk li jixtiequ jerfgħu fil-vara ta’ San Filep huma mitluba li jimlew formola li tinġabar mis-sagristija u magħha jippreżentaw kopja tal-karta tal-identità. Il-formoli mimlija għandhom jingħataw lill-Arċipriet.

Nitolbu għal ħuna Philip Cutajar, li għadda għall-ħajja ta’ dejjem. Agħtih, O Mulej, il-mistrieħ ta’ dejjem. Nitolbu wkoll għall-koppja Vella li tilfu t-tarbija tagħhom Ellie.

Adorazzjoni

It-Tlieta 19 ta’ Mejju, fil-Kappella ta’ San Ġużepp, fl-10.00am ikun hemm l-adorazzjoni li jmexxiha s-Superjur Joe Fenech.

L-Ewwel Tqarbina

Is-Sibt 23 ta’ Mejju fl-4.30pm ikollna l-Ewwel Tqarbina għall-bniet u l-għada l-Ħadd 24 għas-subien fid-9.15am. Nifirħu lil dawn it-tfal u nitolbu għalihom. Bi preparazzjoni għall-Ewwel Tqarbina, se jkun hawn il-qrar għall-ġenituri u għat-tfal, il-Ħamis u l-Ġimgħa mis-6.00pm sas-7.30pm u s-Sibt filgħodu mis-7.30am sal-10.00am.

Trasport għall-Anzjani għall-Quddiesa tal-Festa

Dawk li għandhom xi anzjani li jixtiequ jiġu għall-quddiesa speċjali għalihom fil-ġimgħa tal-festa, nhar it-Tlieta 9 ta’ Ġunju fid-9.30am, u għandhom bżonn trasport, nitolbu lil xi ħadd mill-familjari jagħtuna isimhom fis-Sagristija. Dawk ukoll li għandhom xi qraba emigranti li se jkunu fostna fil-jiem tal-festa nitolbuhom ukoll li jgħaddu l-ismijiet tagħhom fis-sagristija.

Reffiegħa għall-vara ta’ San Filep

Dawk li jixtiequ jerfgħu fil-vara ta’ San Filep huma mitluba li jimlew formola li tinġabar mis-sagristija u magħha jippreżentaw kopja tal-karta tal-identità. Il-formoli mimlija għandhom jingħataw lill-Arċipriet.

Nitolbu għal ħutna Ġużi Schembri, Alfred Vella, Sr Elvira Caruana, Joseph Ebejer u Lucia Guirey, li għaddew għall-ħajja ta’ dejjem. Agħtihom, O Mulej, il-mistrieħ ta’ dejjem.

Jum l-Omm

Qegħdin niċċelebraw Jum l-Omm u għalhekk nitolbu għalihom ilkoll. F’din il-ġurnata, iċ-Ċimiterju jkun miftuħ mis-7.00am sat-3.30pm.  

Festa Liturġika ta’ San Filep

It-Tlieta 12 ta’ Mejju, Jum il-Festa Liturġika ta’ San Filep, fis-6.30pm ikollna  l-Quddiesa Solenni tal-Festa li se titmexxa minn Mons. Jesmond Manicaro. Nistednukom sabiex tattendu u tieħdu sehem fil-quddiesa f’din il-ġurnata tant għażiża għalina.

Laqgħa Grupp Kelma tal-Ħajja

It-Tlieta 12 ta’ Mejju jiltaqa’ l-Grupp tal-Kelma tal-Ħajja fid-9.30am għand is-Sorijiet.

Laqgħa għall-Koppji Miżżewġiin

Il-Ġimgħa 15 ta’ Mejju fis-7.00pm, il-Kummissjoni Familja qiegħda torganizza laqgħa għall-koppji miżżewġin bit-tema ‘Familja Aħjar’, immexxija min-Nutar Dr Philip Ellul. Il-laqgħa ssir fis-Sala tas-Sorijiet (taħt l-Uffiċċju Parrokkjali).

Reffiegħa għal San Filep

Dawk li jixtiequ jerfgħu fil-vara ta’ San Filep huma mitluba li jimlew formola li tinġabar mis-sagristija u magħha jippreżentaw kopja tal-karta tal-identità. Il-formoli mimlija għandhom jingħataw lill-Arċipriet.

Reġistrazzjoni tat-tfal għall-Iskola

Il-Kap tal-iskola primarja tavża li l-iskola qed tilqa’ applikazzjonijiet għad-dħul fl-iskola għal dawk it-tfal li twieldu fis-sena 2023. Ir-reġistrazzjoni ssir fl-iskola stess.  

Ġabra Speċjali

Il-ġabra speċjali li saret fi tmiem il-ġimgħa l-oħra kienet ta’ €1,800. Nirringrazzjawkom tal-ġenerożità tagħkom.

Nitolbu għal ħutna John Fenech, Gemma Scicluna, Raymond Tabone u Anthony Agius, kif ukoll għall-ommijiet kollha li għaddew għall-ħajja ta’ dejjem. Agħtihom, O Mulej, il-mistrieħ ta’ dejjem. 

Attività għat-Tfal li se jirċievu l-Ewwel Tqarbina

Nhar it-Tnejn (4/5) u l-Ħamis (7/5) se ssir attività fil-Knisja Arċipretali għat-tfal li se jirċievu l-Ewwel Tqarbina. Nhar it-Tnejn jattendu t-tfal bniet, filwaqt li l-Ħamis jattendu t-tfal subien. L-attivita’ tibda fil-5.15pm. 

Festa ta’ San Ġorġ Preca

Il-Ġimgħa 8 ta’ Mejju niċċelebraw il-festa ta’ San Ġorġ Preca. Il-quddiesa tas-6.30pm tkun animata mis-Soċjetà tal-MUSEUM.

Jum l-Omm

Nhar il-Ħadd (10/5) niċċelebraw ukoll Jum l-Omm. Il-quddiesa tad-9.30am tkun animata b’mod speċjali għal din l-okkażjoni. Inħeġġu lill-familji bit-tfal biex jieħdu sehem. It-tfal huma mistiedna jġibu fjura magħhom biex joffruha lill-Madonna, l-Omm tagħna tas-sema. Għal Jum l-Omm, iċ-Ċimiterju tal-Qalb ta’ Ġesù jkun miftuħ nhar is-Sibt u l-Ħadd mis-7.00am sat-3.30pm.

Laqgħa ta’ Talb

Is-Sibt 9 ta’ Mejju fis-Seminarju tal-Virtù, ir-Rabat, se ssir laqgħa ta’ talb għall-vokazzjonijiet. Tibda b’adorazzjoni fil-5.30pm. Qed tiġi organizzata minibus li titlaq fil-5.00pm minn ħdejn il-posta. Min hu interessat jinkiteb fis-sagristija.

Buffet Breakfast

It-Tlieta 12 ta’ Mejju se jsir Buffet Breakfast fis-Soreda Hotel b’riżq il-knisja. Il-private titlaq fit-8.30am minn ħdejn il-Posta. Min jixtieq jattendi jkellem lil xi ħadd mill-membri tal-grupp tal-fundraising.

Tindif tal-Knisja

Kull nhar ta’ Ħamis filgħodu, grupp żgħir ta’ nisa jiltaqgħu hawn fil-knisja biex b’mod volontarju jieħdu ħsieb it-tindif tagħha. Nixtiequ nagħmlu appell biex jekk hawn min jista’ jingħaqad magħhom f’din il-ħidma, ikun apprezzat ħafna. B’mod regolari dan il-grupp jiltaqa’ għad-8.45am. Nixtiequ nirringrazzjaw lil dawk li diġa’ qegħdin jagħtu dan is-servizz u lil dawk li lesti joffru li jingħaqdu magħhom.

Damask Ġdid

Fil-korsija tan-nofs ġew imdendlin żewġ pilastri tad-damask il-ġdid. Dawn għad irid isir aktar xogħol fuqhom ’il quddiem biex ikunu kompluti bil-gallun isfar mad-dawra. Madankollu, għalissa hu meħtieġ li d-drapp jingħata żmien imdendel biex jilħaq jieħu postu. Nittamaw li sal-festa jkollna l-erba’ pilastri l-oħra bid-drapp il-ġdid ukoll.

Ġabra Speċjali

Fl-Ewwel Ħadd tax-xahar issir il-ġabra speċjali għall-bżonnijiet tal-knisja. Nirringrazzjawkom tal-għajnuna tagħkom li dejjem tagħtu permezz tal-offerti tagħkom.

Nitolbu għal ħutna Alfred Psaila, Ian James Guirey u Alfred Muscat, li għaddew għall-ħajja ta’ dejjem. Agħtihom, O Mulej, il-mistrieħ ta’ dejjem.

Jum il-Vokazzjonijiet

Il-Knisja Universali dan il-Ħadd tiċċelebra Jum il-Vokazzjonijiet. Imħeġġin nitolbu lil Sid il-ħsad jibgħat ħaddiema fl-għalqa Tiegħu.

Bake Sale b’riżq iċ-Ċentru ta’ Warda

Il-Ħadd (26/04), fuq iz-zuntier qed isir Bake Sale (bejgħ ta’ kejkijiet, ħelu u pjanti) b’risq iċ-Ċentru taż-Żgħażagħ Ta’ Warda. Ħaġa sabiħa li ngħinu f’din l-inizjattiva.

Laqgħa għall-Ġenituri dwar l-Ewwel Tqarbina

It-Tlieta (28/04) se ssir laqgħa għall-ġenituri li uliedhom se jagħmlu l-Ewwel tqarbina f’Mejju li ġej. Il-laqgħa se ssir fis-Sala Parrokkjali (id-Domus) fis-7.00pm.

Festa San Ġużepp Ħaddiem

Il-Ġimgħa (01/05) hija l-Ewwel Ġimgħa tax-xahar u nagħmlu l-Festa ta’ San Ġużepp Ħaddiem. Filgħodu jkun hawn l-adorazzjoni minn wara l-quddiesa tas-7.00am sat-8.00am. Dakinhar imħeġġin nitolbu għall-vokazzjonijiet saċerdotali.

Laqgħat ta’ Katekeżi

Infakkru li kull nhar ta’ Tnejn u nhar ta’ Ħamis qed isiru laqgħat ta’ katekeżi u tagħlim fis-Santwarju tal-Qalb ta’ Ġesù, fis-7.30pm. Dawn il-laqgħat huma indirizzati għall-adulti u ż-żgħażagħ.

Ġabra għall-Karita’

Il-ġbir li sar fil-quddies nhar is-Sibt u l-Ħadd li għaddew b’risq il-ħidma ta’ Karità li twettaq id-Djoċesi ta’ Malta, kien jammonta għal €2,568.

Nitolbu għal ħutna Tereża Gravina u Antonia Agius, li għaddew għall-ħajja ta’ dejjem. Agħtihom, O Mulej, il-mistrieħ ta’ dejjem. 

Festa tal-Lunzjata

Qiegħdin niċċelebraw il-festa tal-Lunzjata fil-kappella dedikata lilha fi Triq il-Kbira. (Illejla) issir quddiesa fis-6.30pm u (għada) l-Ħadd fis-6.00pm jingħad ir-Rużarju u fis-6.30pm tiġi ċċelebrata l-quddiesa tal-festa, li tagħlaq bil-Barka Sagramentali.  

Adorazzjoni

It-Tlieta (21/04) fl-10.00am, ikun hemm l-adorazzjoni fil-kappella ta’ San Ġużepp għand is-sorijiet, animata mis-Superjur Joe Fenech.

Velja ta’ Talb

L-Erbgħa (22/04) se ssir Velja ta’ Talb għall-Paċi fl-Art Imqaddsa, fis-7.00pm fil-Knisja ta’ Ġieżu l-Belt (fejn hemm meqjum il-Kurċifiss Mirakoluż). Din il-velja qed tiġi organizzata mill-Kummissarju tal-Art Imqaddsa u l-Patrijiet Franġiskani.

Laqgħa għall-Koppji Miżżewġin

Il-Ġimgħa (24/04) se ssir laqgħa għall-koppji miżżewġin, organizzata mill-Kummissjoni Familja. Il-laqgħa se tkun fis-7.00pm fis-sala tas-Sorijiet. Il-kelliema se tkun Ms Anna Micallef mill-Caritas.

Playgroup għat-Tfal

Il-Moviment ta’ Kana jorganizza Playgroup għat-tfal ta’ bejn sena u 3 snin kull nhar ta’ Tnejn filgħodu fiċ-Ċentru Ta’ Warda. Għal dawk li huma interessati, hemm iktar informazzjoni fuq in-noticeboards.

Jum il-Karità

Fid-Djoċesi tagħna, illum qed jiġi ċċelebrat Jum il-Karità. Il-Knisja ta’ Malta fil-preżent qed toffri residenza u sapport lil madwar 1,600 persuna. Dawn jinkludu tfal u żgħażagħ u anzjani, inkużi saċerdoti, persuni b’diżabilità u persuni li m’għandhomx fejn jgħixu. Toffri wkoll għajnuna lil persuni maqbuda fil-vizzju tad-droga, migranti u vittmi ta’ vjolenza domestika. Barra dan, il-parroċċi, permezz tal-Kummissjoni Djakonija, jgħinu ħafna familji li jkunu jinsabu fil-bżonn. Għal dan il-għan, il-ġbir li jsir fil-quddiesa ikun b’riżq il-ħidma wiesa’ ta’ karità li twettaq il-Knisja f’pajjiżna.

Nitolbu għal ħutna Emanuela Caruana, Catherine Bonanno u Anthony Saliba, li għaddew għall-ħajja ta’ dejjem. Agħtihom, O Mulej, il-mistrieħ ta’ dejjem. 

Festa tal-Ħniena Divina

Qegħdin nagħmlu l-Festa tal-Ħniena Divina. Għada / Illum fis-5.45pm nibdew bl-Adorazzjoni u l-Kurunella u t-talba tal-Ħniena Divina u fis-6.30pm ikun hawn il-quddiesa tal-festa.

Laqgħat ta’ Katekeżi

Se jibdew laqgħat ta’ katekeżi għall-adulti u għaż-żgħażagħ immexxija minn membri tal-Mixja Neo-Katekumenali. Il-laqgħat ikunu kull nhar ta’ Tnejn u nhar ta’ Ħamis. Jibdew minn nhar it-Tnejn 13 ta’ April, fis-7.30pm, fis-Santwarju tal-Qalb ta’ Ġesù.

Laqgħa Grupp Kelma tal-Ħajja

It-Tlieta (14/04) fid-9.30am issir il-laqgħa tal-Grupp tal-Kelma tal-Ħajja. Il-laqgħa ssir għand is-sorijiet.

Seminar għall-Ġenituri (Griżma tal-Isqof)

Is-Sibt (18/04) se jsir seminar għall-ġenituri li uliedhom se jirċievu s-Sagrament tal-Griżma f’Ottubru ta’ din is-sena. Is-seminar se jsir fl-iskola St. Michael’s, Santa Venera, bejn l-4.30pm u s-7.00pm. Il-ġenituri huma mħeġġa li jattendu.              

Festa tal-Lunzjata

Is-Sibt u l-Ħadd (18 u 19 ta’ April) issir il-festa tal-Lunzjata fil-kappella dedikata lilha. Kemm is-Sibt kif ukoll il-Ħadd fis-6.00pm jingħad ir-Rużarju u fis-6.30pm issir il-quddiesa. Il-Ħadd il-festa tagħlaq bil-barka sagramentali.

Jum il-Karità

Is-Sibt u l-Ħadd li ġej fid-Djoċesi niċċelebraw Jum il-Karità. Il-Knisja ta’ Malta fil-preżent qed toffri residenza u sapport lil madwar 1,600 persuna. Dawn jinkludu tfal u żgħażagħ u anzjani, inkużi saċerdoti, persuni b’diżabilità u persuni li m’għandhomx fejn jgħixu. Toffri wkoll għajnuna lil persuni maqbuda fil-vizzju tad-droga, migranti u vittmi ta’ vjolenza domestika. Barra dan, il-parroċċi, permezz tal-Kummissjoni Djakonija, jgħinu ħafna familji li jkunu jinsabu fil-bżonn. Għal dan il-għan, il-ġbir li jsir is-Sibt u l-Ħadd li ġej ikun b’riżq il-ħidma wiesa’ ta’ karità li twettaq il-Knisja f’pajjiżna.

Karus ta’ Mħabba

Mill-Karus ta’ Mħabba nġabru €1,038. B’dawn il-fondi se jinxtraw filters tal-ilma għal familji foqra fil-Gwatemala biex ikollhom ilma tajjeb għax-xorb. L-offerti li nġabru matul il-Ġimgħa Mqaddsa b’riżq l-għajnuna li jagħti s-Segretarjat Assistenza Soċjali tal-Azzjoni Kattolika lill-familji fil-bżonn kienu jammontaw għal €600.

Nitolbu għal ħutna Alfred Psaila u Raymond Cini, li għaddew għall-ħajja ta’ dejjem. Agħtihom, Mulej, il-mistrieħ ta’ dejjem.

Ħadd il-Għid

Fid-9.00am toħroġ il-purċissjoni ta’ Kristu Rxoxt. Fid-9.30am ikollna quddiesa speċjali tal-Għid għat-tfal u l-familji. F’nofsinhar isir it-tberik tal-figolli fuq iz-zuntier.

Laqgħa Grupp Padre Pio

L-Erbgħa (08/04) jmiss il-laqgħa tal-Grupp ta’ Padre Pio li tibda fis-6.00pm bit-talba tar-Rużarju meditat.

Via Lucis

Il-Ħamis (09/04) fis-6.00pm se ssir Via Lucis b’meditazzjonijiet fuq il-misteru tal-Qawmien ta’ Kristu.

Festa tal-Ħniena Divina

Nhar il-Ħadd li ġej (12/04) niċċelebraw il-Festa tal-Ħniena Divina. Fis-5.45pm ikun hawn Adorazzjoni quddiem Ġesù Ewkaristija u wara, fis-6.30pm, ikun hawn il-quddiesa.

Ġabra b’risq il-Festi tal-Għid

Il-ġabra li saret is-Sibt u l-Ħadd li għadda b’risq il-festi tal-Għid kienet ta’ €2,350. Il-ġabra li saret nhar Ħamis ix-Xirka b’riżq id-Dar tal-Kleru kienet ta’ €800. Nirringrazzjawkom.

Coffee Morning

It-Tlieta 14 ta’ April fid-9.15am se jsir Coffee Morning b’riżq il-knisja. Biljetti mingħand il-membri tal-grupp tal-fundraising.

Awguri tal-Għid

F’isem il-Kleru u l-Kunsill Pastorali Parrokkjali, nawguraw lil kulħadd l-Għid it-tajjeb.    

Nitolbu għal oħtna Pauline Borg, li għaddiet għal ħajja ta’ dejjem. Agħtiha, O Mulej, il-mistrieħ ta’ dejjem.

Il-Ġimgħa Mqaddsa

Qegħdin nagħtu bidu għall-Ġimgħa Mqaddsa bit-tifkira solenni tad-Daħla ta’ Ġesu’ f’Ġerusalemm. Għada (illum) fid-9.00am issir iċ-ċerimonja tat-tberik taż-żebbuġ f’Misraħ l-Isptar u wara ssir purċissjoni sal-Knisja fejn tkompli l-quddiesa.

• It-Tnejn, it-Tlieta u l-Erbgħa jkollna dan il-programm: fis-6.10pm ngħidu flimkien it-talba tal-Għasar, fis-6.30pm il-quddiesa, li tkun animata bil-kant, u wara jkun hawn ħin ta’ riflessjoni u talb b’temi marbutin mal-Passjoni ta’ Kristu.
• Nhar Ħamis ix-Xirka filgħodu ma jkunx hawn quddies. Filgħodu l-Arċisqof imexxi ċ-ċelebrazzjoni bit-Tberik taż-Żjut, fil-Kon-Katidral ta’ San Ġwann,flimkien mas-saċerdoti. Fis-6.30pm tibda l-Funzjoni ta’ Ħamis ix-Xirka u fitmiem il-quddiesa Ġesu’ Ewkaristija jittieħed proċessjonalment fl-altar tal-adorazzjoni u minn dak il-ħin inkunu nistgħu nagħmlu l-viżti u l-adorazzjoni tagħna. Fl-10.30pm ikun hawn Viżti mmexxija mis-saċerdoti u f’nofsillejl tagħlaq il-knisja.
• Nhar il-Ġimgħa l-Kbira, il-Knisja tiftaħ fis-6.30am u jibdew il-viżti. Fid-9.00am nistednukom għat-talb tal-Uffiċċju tal-Qari u t-Tifħir ta’ Sbiħ il-Jum magħna s-saċerdoti. Il-knisja tagħlaq f’nofsinhar u jintemmu l-viżti. Fit-3.00pm nagħtu bidu għall-funzjoni tal-Adorazzjoni tas-Salib. Kif tintemm il-funzjoni, il-knisja tingħalaq biex ikunu jistgħu jsiru l-preparamenti għall-purċissjoni. Ħadd mhu se jitħalla joqgħod fil-knisja ħlief dawk biss li se jieħdu sehem, jiġifieri dawk li għandhom it-tessera (personaġġi, reffiegħa u helpers). Fil-5.30pm toħroġ il-purċissjoni kif indikat fil-programm.
• Sibt il-Għid filgħaxija, il-knisja tiftaħ fis-7.15pm. Fit-8.00pm nagħtu bidu għall-funzjoni tal-Vġili tal-Għid. Nhar Ħadd il-Għid fid-9.00am toħroġ il-purċissjonibl-Irxoxt. Fid-9.30am ikollna quddiesa speċjali tal-Għid għat-tfal u l-familji. Dakinhar it-tfal iġibu l-Karus ta’ Mħabba. F’nofsinhar isir it-tberik tal-figolli fuq iz-zuntier.

Ġimgħa ta’ Sagrifiċċju

L-Azzjoni Kattolika, permezz tas-Segretarjat Assistenza Soċjali, matul dawn il-ġranet torganizza Ġimgħa ta’ Sagrifiċċju. Inħeġġukom biex ngħinu l-ħidma ta’ karita’ li twettaq l-Azzjoni Kattolika ma’ familji u persuni fil-bżonn billi nagħtu xi offerta ta’ flus fil-kaxxa li hawn ħdejn l-altar.

Wirja tal-Vestwarju

Fl-Oratorju qed tittella’ wirja tal-vestwarju ġdid li se jiżżanżan din is-sena fil-purċissjoni tal-Ġimgħa l-Kbira. Il-wirja se tkun miftuħa s-Sibt mis-6.00pm sat-8.00pm u l-Ħadd filgħodu mit-8.00am sa nofsinhar.

Ġabra Speċjali

Illum qegħdin nagħmlu ġabra speċjali għall-ispejjeż marbutin mal-Festi tal-Għid u l-purċissjoni tal-Ġimgħa l-Kbira. Nirringrazzjawkom tal-għajnuna tagħkom li dejjem tagħtu permezz tal-offerti tagħkom.

Nitolbu għal ħutna Joseph Cassar u Anabel Mangion, li għaddew għall-ħajja ta’ dejjem. Agħtihom, O Mulej, il-mistrieħ ta’ dejjem.